Täjigistanda 8 syýasatçynyň, jemgyýetçilik işgärleriniň işine seredilýär

Täjigistanda öň ýokary wezipelerde işlän 8 adamyň, syýasatçylaryň we jemgyýetçilik işgärleriniň ýapyk gapylaryň arkasynda geçirilýän kazyýet işi başlandy. Olar häkimiýeti zor bilen ele geçirmek barada meýilnama düzmekde, köpçülikleýin bidüzgünçiliklere çagyrmakda we ýigrenji öjükdirmekde aýyplanýar.


Duşenbe şäherindäki deslapky tussaghanada başlanan kazyýet işinde öňki daşary işler ministri Hamrohon Zarifi, Daşary işler ministrliginiň öňki metbugat sekretary Abulfaiz Atoi we parlamentiň öňki başlygy Akbarşoh Iskandarow dagynyň işleri seljerilýär.


Kazyýet işine seredýän kazylar, Ýokary kazyýetiň resmileri Azatlyk Radiosyna düşündiriş bermekden ýüz öwürdiler. Bu işiň materiallarynyň baş prokuratura tarapyndan gizlin saklanmagy we işine seredilýän sekiz adama bildirilýän aýyplamalaryň takyk jikme-jiklikleriniň belli däldigini aňladýar.


Täjik hökümeti soňky ýyllarda başgaça pikirlenýänleri rehimsizlik bilen basyp ýatyrýar, oppozisiýa syýasatçylaryny türmä basýar ýa-da bosgunlyga çykmaga mejbur edýär. Şeýlelikde, garaşsyz žurnalistleriň, aktiwistleriň we hökümet tankytçylarynyň onlarçasy uzak möhletli türme tussaglygyna höküm edildi.