Абай өлкәсе Язучылар берлеге рәисе: Безнең рухи дөньябыз Казанда барлыкка килгән

Казахстан Республикасының Абай өлкәсе Язучылар берлеге рәисе, Абай өлкәсе китапханәсе директоры Мерей Карт «Татар-информ» хәбәрчесенә Казан шәһәре һәм татар халкы җирлеге белән бәйләнеш турында сөйләде. Бу хакта ул Габдулла Тукай әдәби музеенда Казахстан Республикасы Семей (Сәмәй) шәһәренең Абай исемендәге өлкә китапханәсе «Абай исемендәге китапханәнең китап раритетлары» дигән китап экспозициясен тәкъдим итү кичәсе алдыннан әйтте.

«Казахлар өчен Казан каласы – тарихи һәм изге шәһәр. Безнең рухи дөньябыз Казанда барлыкка килгән. Бабаларыбыз – казах язучылары, шагыйрьләре Дулат Бабатайулы, Абай, Мухтар, Шакаримның үз вакытында Казанда беренче китаплары басылып чыккан. Без, төгәлрәк әйткәндә, Казахстан халкы өчен Казан шәһәренең кыйммәте бик зур», – диде ул.

Ул Казанга барганчы, нәрсә алып килә алулары турында уйланганнарын әйтте. «Абай китапханәсендә Казан каласында ХХ гасырда чыккан китаплар бик күп. Шул китапларның иң-иңнәрен, татар халкын һәм казахларны рухи яктан берләштергән иң борынгы китапларны алып кайттык. Шулай ук, Абай, Шакарим – казах әдипләренең дөньясын да алып килдек. Кыйммәте зур булган китаплар барысы да биредә. Казан халкын рухи яктан баетырга ниятебез бар», – диде Мерей Карт.

«Казан җирлегенә аяк басуыма бик куандым. Тарихи җирләр бу. Безнең ата-бабаларыбыз рухи бәйләнеш булдырганнар. Казан белән Абай өлкәсе арасындагы рухи бәйләнеш өзелмичә дәвам итүенә бик шатмын», – диде Абай өлкәсе Язучылар берлеге рәисе.

Бер ай элек казах иҗатчыларының әсәрләре татар теленә тәрҗемә ителеп, антология буларак дөнья күргән. «Мәсәлән, Абайның әсәрләрен «Казан утлары» журналы баш мөхәррире Рөстәм Галиуллин татарчага тәрҗемә итте. Шулай ук, татар әдипләренең әсәрләре дә казах теленә тәрҗемә ителеп антология буларак чыкты», – дип билгеләп үтте Мерей Карт.