Алексеевск – Әлмәт юлын декабрь ахырында ачарга җыеналар

Алексеевск – Әлмәт түләүле юлын быелның декабрь ахырында ачарга җыеналар. Кичә эшләр барышын Татарстанның транспорт һәм юл хуҗалыгы министры Фәрит Хәнифов карады, дип хәбәр итә министрлыкның матбугат хезмәте Телеграм-каналда.

Укучыларның берсе язмага комментарийларда яңа трассаның кайчан ачылачагы турында кызыксынган. «Ачылу агымдагы елның декабрь азагында планлаштырыла», — дип җавап бирделәр матбугат хезмәтендә.

Яңа трассада йөрү бәясе әлегә билгеле түгел, диделәр министрлыкта.

Дүрт полосалы, түләүле Алексеевск – Әлмәт юлы 145 километр озынлыкта. Ул Алексеевск, Чистай, Яңа Чишмә, Чирмешән һәм Әлмәт районнары аша үтә.

Юл М7 «Волга» һәм М5 «Урал» федераль трассаларын берләштерә торган Шәле (М5) – Баулы (М5) трассасы составына керә һәм «Европа – Көнбатыш Кытай» халыкара транспорт маршрутының бер өлеше булачак.