Ջենիֆեր Լոպեսը կոչ է արել ընտրել Հարրիսին (լուսանկարներ)

Ամերիկյան շոու բիզնեսի ամենահայտնի աստղերից մեկը՝ երգչուհի, դերասանուհի Ջենիֆեր Լոպեսը, կոչ է արել նոյեմբերի 5-ի նախագահական ընտրություններում քվեարկել դեմոկրատների թեկնածու Քամալա Հարրիսի օգտին:

Աստղն այս մասին ասել է Լաս Վեգասում թեկնածուի նախընտրական հանրահավաքի ժամանակ, գրում է Daily Mail-ը:

«Յուրաքնչյուրի քվեն կարևոր է»,- հուզված ասել է Լոպեսը:

Նա նաև անդրադարձել է հոկտեմբերի 28-ին Նյու Յորքում նախագահի հանրապետական թեկնածու Դոնալդ Թրամփի նախընտրական հանրահավաքի բացման ժամանակ տեղի ունեցած աղմկահարույց միջադեպին, երբ ամերիկացի կատակերգու Թոնի Հինչքլիֆը Պուերտո Ռիկոն անվանել էր «լողացող աղբի կղզի»։ Հոկտեմբերի 29-ին Ջո Բայդենը, մեկնաբանելով այս ելույթը, ասել էր.«Միակ աղբը, որը ես տեսնում եմ այնտեղ, նրա կողմնակիցներն են։ Նրա կողմից լատինաամերիկացիների դեմոնիզացիան անողոք է»։ Ավելի ուշ Սպիտակ տունը հայտարարել էր, որ նախագահը նկատի ուներ կատակերգուին և նրա ոչ հարիր կատակը։

«Այդ օրը վիրավորվել են ոչ միայն պուերտոռիկացիները, այլ այս երկրի բոլոր լատինաամերիկացիները», - ասել է Լոպեսը՝ հիշեցնելով, որ ինքը ևս պուերտոռիկացի է: