Эльвира Нәбиуллина Россия икътисады үсешен дәвам итәчәк дип саный

Үзәк Банк Россия икътисадының алга таба да үсәчәген, әмма уртача темплар белән үсәчәген исәпкә алып эш итә. Шулай ук импортны алмаштыру, автоматлаштыру һәм хезмәт җитештерүчәнлеген арттыру белән бәйле структур үзгәртеп кору дәвам итәчәк. Бу хакта регулятор җитәкчесе Эльвира Нәбиуллина, югары ставкаларны озак саклау аркасында төбәкләрдә икътисад өчен куркыныч туу турындагы сорауга җавап биргәндә белдерде.

Шунысын да билгеләп үтәргә кирәк, мисал өчен, Татарстанда зур сәнәгать предприятиеләренә бәйле икътисад хәзер ышанычлы рәвештә үсә.

Нәбиуллина белдергәнчә, кайбер Россия производстволары көнбатыш компанияләре китүгә бәйле рәвештә тагын да көчлерәк үсәчәк. Өстәвенә, аларның урыннарын биләгән предприятиеләр ике тапкыр зуррак темплар белән дә үсәргә мөмкин, дип спикерның сүзләрен китерә «Республика Татарстан» газетасы.

Әмма производстволарның бер өлеше ихтыяҗ кимүен кичерергә мөмкин. Аларга яңа мөмкинлекләр, яңа урыннар табарга кирәк, дип саный Россия Үзәк банкы җитәкчесе.

Искәртик, узган утырышта Үзәк банк ставканы 21 процентка кадәр күтәрергә карар кабул итте. Мондый гамәлләр белән регулятор бәяләр үсешен акрынайтырга тырыша. Шул ук вакытта Татарстанда инфляция сентябрьдә 8,7 процент тәшкил иткән. Бу Идел буе федераль округындагы (8,3 процент) һәм гомумән Россиядәге (8,6 процент) белән чагыштырганда югарырак. Ел ахырына кадәр аналитиклар Үзәк Банкның 4 процентына әллә ни алга китешне фаразламый.