«Բոլոնիա»-«Միլան» խաղը հետաձգվել է հեղեղումների պատճառով
«Միլանի» հանդիպումը «Բոլոնիայի» հետ վերջնականապես հետաձգվել է եղանակային պայմանների պատճառով։ Ա Սերիայի 9-րդ տուրի հանդիպումը պետք է կայանար հոկտեմբերի 26-ին Բոլոնիայի «Ռենատո Դալ Արա» մարզադաշտում։
Հանդիպումը տեղի իշխանությունների որոշմամբ հետաձգվել է հորդառատ անձրևների և ջրհեղեղների, ինչպես նաև հարակից վերականգնողական աշխատանքների պատճառով։ Ենթադրվում է, որ նման պայմաններում 35 հազար երկրպագուների ժամանումը մարզադաշտ խնդիրներ կստեղծեր հասարակական կարգի հետ կապված։
«Միլանի» նախագահ Պաոլո Սկարոնին առաջարկել է «Բոլոնիայի» հետ խաղալ առանց հանդիսականի։ Քննարկվել են նաև հանդիպումը չեզոք դաշտում՝ Էմպոլիում կամ Կոմոում անցկացնելու գաղափարները։
Սակայն քաղաքապետ Մատեո Լեպորը և Բոլոնիայի ղեկավարությունը պնդել են հետաձգել հանդիպումը։ Վերջնական որոշումն ընդունվել է Ա սերիայի տնօրենների խորհրդի արտակարգ նիստում:
Այս առումով անհրաժեշտ է որոշում կայացնել խաղի անցկացման նոր ժամկետների վերաբերյալ։ Տարբերակներից մեկը 2025 թվականի ապրիլի 3-ն է, երբ Եվրոպայի գավաթի հանդիպումներ կամ Իտալիայի գավաթի խաղեր չեն լինի: