Այս կանոնակարգը հաղթանակի ճանապարհ է դեպի խաղաղություն ու մեր ինքիշխանություն. Հակոբ Արշակյան (տեսանյութ)
Լաոսում միջխորհրդարանական վեհաժողովում ելույթի ընթացքում, միջազգային հանրությանը դիմելով, ևս մեկ անգամ փաստեցինք, որ պատրաստ ենք Ադրբեջանի հետ ստորագրել խաղաղության պայմանագիրը համաձայնեցված կետերի շուրջ: Այս մասին ԱԺ-ում ասաց ԱԺ նախագահի տեղակալ Հակոբ Արշակյանը:
«Ինձնից երկու ելույթ հետո Ադրբեջանի պատվիրակության ղեկավարը հանդես եկավ ելույթով ու ասաց, որ ՀՀ Սահմանադրության մեջ կա դրույթ, որը հարցականի տակ է դնում ու տարածքային պահանջներ է ներկայացնում Ադրբեջանի նկատմամբ: Այսօրվա մեր այս գործընթացով մենք հստակորեն վավերացնելու ենք մի փաստաթուղթ, որտեղ ամրագրված է Ալմաթիի 1991 թվականի դրույթները, համաձայն որի հստակեցված է Ադրբեջանի ու Հայաստանի միջև գործող սահմանը ու այդ գործընթացի ամբողջ տրամաբանությունը»,- ասաց նա:
Արշակյանը նշեց, որ ՍԴ-ն ամրագրել է, որ ՀՀ Սահմանադրությունը չունի որևէ դրույթ, որով տարածքային պահանջներ է ներկայացնում Ադրբեջանին:
«Այսօր ՀՀ պետականության, տարածքային ամբողջականության, սուվերենության, ինքնիշխանության ևս մեկ անկյունաքար ենք դնելու: Ուզում եմ շնորհակալություն հայտնել Մհեր Գրիգորյանին ու կառավարության ղեկավարին ՀՀ-ն դեպի խաղաղություն տանելու առաջորդության համար, սա հեշտ ճանապարհ չէ, սա բարդ ճանապարհ է, զոհողությունների ճանապարհ է, բայց միևնույն ժամանակ, հաղթանակի ու խաղաղության ճանապարհ է՝ դեպի ինքնիշխանություն»,- ասաց Արշակյանը: