Татарстан хәләл продукция экспортын 16 миллион долларга җиткерергә планлаштыра

Татарстан хәләл продукцияне ел азагына 16 миллион долларга экспортларга планлаштыра. Бу хакта Казанда уза торган «Төбәкләрнең сәнәгать экологиясе» VI халыкара конгрессында Татарстан Республикасы Авыл хуҗалыгы һәм азык-төлек министрлыгы башлыгының беренче урынбасары Ленар Гарипов белдерде.

Аның мәгълүматлары буенча, хәзерге вакытта экспортланган продукция күләме 10,5 миллион долларны тәшкил итә.

«Ел азагына кадәр Согуд Гарәбстаны, Гыйрак, Кувейт, Мисыр, Оман, Алжир, Малайзия, Иордания кебек илләргә экспортлау хисабына 16 миллион долларга ирешү планлаштырыла», — дип китерә ТАСС Гарипов сүзләрен.

Министрның беренче урынбасары шулай ук Татарстан Республикасыннан авыл хуҗалыгы продукциясен экспортлау күләмнәре турында да хәбәр итте. 21 октябрьгә булган мәгълүматларга караганда, республика 52 илгә 305 миллион долларлык товар җибәргән.