Владимир Путин Россиядә массакүләм спортның үтемлелеген арттырырга кушты

Спорт белән даими шөгыльләнүче россиялеләр саны 40 проценттан 56,8 процентка кадәр арткан. Шулай да илдә массакүләм спортның үтемлелеген тагын да арттырырга, моның өчен тиешле шартлар булдыруны дәвам итәргә кирәк әле, дип белдерде кичә РФ Президенты Владимир Путин спорт объектларын ачу тантанасында. Бу хакта Кремльнең матбугат хезмәте хәбәр итә.

Дәүләт башлыгы китергән мәгълүматлар буенча, Россиядә спорт белән шөгыльләнү өчен уңайлы шартлар тудыруга 2019 елдан бирле 160 миллиард сумга якын акча бүленгән. Күп кенә яңа спорт объектлары, шул исәптән стадионнар, спорт мәйданчыклары, бассейннар һәм физкультура-сәламәтләндерү комплекслары барлыкка килгән. 700дән артык спорт мәктәбе өчен яңа җиһазлар сатып алынган.

«Алга таба да массакүләм спортның үтемлелеген, массакүләм спорт казанышларын арттыруны дәвам итәчәкбез. Һәм, әлбәттә, профессиональ спортчыларны нәтиҗәле әзерләү өчен тиешле шартлар тудырачакбыз», - дип искәртте Президент.

Аның сүзләренчә, әлеге күрсәткечләргә ирешү өчен дәүләт, җәмгыять һәм бизнесның көчен берләштерү мөһим.