Хакимият БРИКС саммиты вакытында иске машинада йөрүне тыю турында мәгълүматны кире какты

Татарстан хакимияте БРИКС саммитын уздыру көннәрендә Казанда ниндидер аерым төр машиналар хәрәкәт итүгә чикләүләр кертмәде. Бу хакта «Татар-информ»га ТР Рәисе матбугат хезмәте җитәкчесе Лилия Галимова хәбәр итте.

Элегрәк массакүләм мәгълүмат чараларында шәһәрдә иске автомобильләрдә йөрүне тыю турында расланмаган мәгълүмат пәйда булды.

«Кичә республика Министрлар Кабинетында брифинг булды, анда оператив штаб җитәкчелеге шәһәрдә Брикс саммитын уздыру көннәрендә кертеләчәк барлык вакытлыча чикләүләре турында җентекләп сөйләде. «Иске» шәхси транспортта йөрүне тыю турында бернинди карар да кабул ителмәде. Чикләүләр турында барлык рәсми мәгълүмат республика Хөкүмәте һәм Казан шәһәре мэриясе рәсми ресурсларында урнаштырылган. Уздырылачак чараның мөһимлеген исәпкә алып, рәсми мәгълүматка таянырга чакырабыз», – диде Галимова.

БРИКС саммиты Казанда 22-24 октябрьдә узачак.