Татарстан һәм Чечня шәригать нормалары буенча беренче төбәкара килешү оештырды

Ислам финанславы буенча эксперимент кысаларында Цифрлы мудараба продукты буенча беренче төбәкара килешү булды. Оештыручысы – ислам банкингы өлкәсендә Татарстаннан «Әс-Сәлам» проекты, инвесторы - Чечнянең Шәех Зәйед исемендәге эшмәкәрлеккә һәм инновацияләргә ярдәм итү фонды, ә акча алучы – Татарстанның «Амаль» финанс йорты. Бу хакта «Татар-информ»га «Амаль» финанс йорты генераль директоры Рөстәм Садриев хәбәр итте.

«Бу партнерлык финанслары буенча эксперимент башланганнан соң моңарчы булмаган килешү, һәм тарихта мондый килешүләр юк. Бу нәкъ менә партнерлык финанслары белән шөгыльләнүче ислам финанс компанияләре өлешендә билгеле «межбанк». Чынлыкта бу бик мөһим момент, чөнки финанс базары өчен 40 миллион зур сумма түгел, әмма бу прецедент», – диде Садриев.

Аның сүзләренчә, бу инструмент киләчәктә финанс учреждениеләренә зур суммалар җәлеп итәргә мөмкинлек бирәчәк.

«Ликвидлык артык булганда, бу акчаларны дин буенча рөхсәт ителгән ысуллар буенча урнаштырып булачак. Акчасы җитмәүчеләр бу мәйданчыкта акча җәлеп итә алачак», – дип аңлатты спикер.

Садриев сөйләгәнчә, әлеге килешү аерым бер республика кысаларында түгел, ә ил масштабы кысаларында үткәрелгән.

«Акча илнең бер өлешендә булган бер финанс компаниясеннән, димәк, илнең икенче өлешендә булган икенче финанс компаниясенә кергән. Ягъни монда географик момент шулай ук игътибарга лаек. Федераль масштабтагы килешү дип әйтергә була», - диде ул.