Казанда БРИКС саммиты вакытында самокат һәм велосипедларны прокатка алу тыела

Казанда 19 октябрьдән 24 октябрьгә кадәр БРИКС саммиты оештырылган вакытта самокат һәм велосипед прокаты хезмәтләре тыелачак. Бу хакта Татарстан Хөкүмәте йортындагы брифингта Казан шәһәре Башкарма комитеты җитәкчесе Рөстәм Гафаров хәбәр итте.

«Самокат һәм велосипедларны арендага бирә торган компанияләр 19 октябрьдән 24 октябрьгә кадәр хезмәт күрсәтмәячәк. Шәһәр үзәгендә дә, башка районнарда да. Бу террорчылыкка каршы комиссия тәкъдиме белән бәйле», - дип аңлатты Рөстәм Гафаров.

Аның әйтүенчә, хәзер шәһәрдән электр самокатлары һәм велосипедлар чыгару буенча эш алып барыла. Шулай ук бу чикләүләр каршерингка да кагыла (каршеринг – минут саен тарифлаштырылган автомобиль арендасы). Саммит уздыру сәбәпле, ябылырга мөмкин булган юлларда, муниципаль парковкаларда машиналарны калдырырга ярамый.