Ինիեստան արձագանքել է այն շշուկներին, թե ինքը Մադրիդի «Ռեալի» երկրպագու է

«Բարսելոնայի» և Իսպանիայի հավաքականի նախկին կիսապաշտպան Անդրես Ինիեստան մեկնաբանել է այն լուրերը, թե մանուկ հասակում աջակցել է Մադրիդի «Ռեալին»։

«Ես «Ռեալի» երկրպագու՞ էի։ Բացարձակապես ոչ: Նրանք իմ մասին շատ բաներ են ասել, որոնք չեն համապատասխանում իրականությանը, այդ թվում այն, թե՝ ես նախնական պայմանագիր եմ կնքել իրենց հետ։ Թող համակերպվեն»,- Ինիեստայի խոսքերն է մեջբերում AS-ը։

Անդրես Ինիեստան «Բարսելոնայի» կազմում հանդես է եկել 1996-2018 թվականներին: Այս ընթացքում նա բոլոր մրցաշարերում հիմնական թիմի կազմում մասնակցել է 674 հանդիպման, որոնցում դարձել է 57 գոլի և 136 գոլային փոխանցման հեղինակ։ Անդրեսը հասցրել է խաղալ նաև ճապոնական «Վիսել Կոբեում», որտեղ իսպանացին բոլոր մրցաշարերում մասնակցել է 134 հանդիպման, դարձել է 26 գոլի և 25 գոլային փոխանցման հեղինակ։

 
Ինիեստայի վերջին ակումբը եղել է Արաբական Միացյալ Էմիրությունների «Էմիրեյթս» ակումբը, որտեղ նա կարողացել է 23 խաղում խփել 5 գոլ։

Իսպանիայի հավաքականի կազմում Ինիեստան երկու անգամ հաղթել է Եվրոպայի առաջնույունում, ինչպես նաև դարձել է աշխարհի առաջնության հաղթող: