Իրանում 39 պատգամավորներ դիմել են բարձրագույն խորհրդին՝ կոչ անելով վերանայել միջուկային զենքն արգելող պաշտպանական դոկտրինը
Իսլամական խորհրդի ներկայացուցիչը տեղեկացրել է, որ խորհրդարանի 39 պատգամավորներ նամակ են հղել Ազգային անվտանգության բարձրագույն խորհրդին՝ խնդրելով վերանայել Իրանի Իսլամական Հանրապետության պաշտպանական դոկտրինը:
Հոջաթուլ-Իսլամ Հասան Ալի Ախլիկ Ամիրին «Իսնա»-ի հետ զրույցում ընդգծել է, որ խոսքն Իսրայելի հարձակման սպառնալիքի պատճառով միջուկային զենք ստեղծելու թույլտվության խնդրանքի մասին է:
Իրանը բազմիցս ընդգծել է, որ երկրում գործում է գերագույն առաջնորդի ֆեթվան, որ միջուկային զենքի արտադրությունը հակասում է իսլամին։ Իրանցի քաղաքական գործիչները դա նշում են որպես ազգային միջուկային ծրագրի բացառապես խաղաղ բնույթի փաստարկ։ Երկրի պաշտպանական դոկտրինն արգելում է այս տեսակի զենքի ստեղծումը։