Татарстанда «Беренчеләр хәрәкәте» җитәкчесе: Рәис мөрәҗәгате патриотизм белән сугарылган

«Беренчеләр хәрәкәте» Бөтенроссия балалар һәм яшьләр хәрәкәтенең төбәк бүлеге җитәкчесе, Татарстан Рәисе ярдәмчесе Тимур Сөләйманов фикеренчә, Татарстан Рәисе Рөстәм Миңнехановның парламентка Юлламасында патриотлыкка һәм халыкка мәхәббәт темасына зур игътибар бирелгән.

«Минем карашка, бөтен мөрәҗәгать патриотизм темасына багышланган иде, бу тема белән сугарылган иде. Сүз балаларны һәм яшьләрне безнең традицион кыйммәтләр рухында тәрбияләү, бу эштә педагогларның һәм остазларның роле, моның белән балалар бакчасыннан башлап шөгыльләнергә кирәклеге турында барганда бу мәсьәләгә аерым игътибар бирелде», - дип билгеләп үтте ул.

Татарстан - «Беренчеләр хәрәкәте» балалар бакчаларындагы иң кечкенә балалар белән эшли башлаган сынау төбәге, диде Тимур Сөләйманов. Ул билгеләп үткәнчә, Татарстан Республикасы Рәисе төрле категориядәге балалар һәм яшьләр белән эшләүнең мөһимлеген ассызыклады. Активистлар белән генә түгел, ә әлегә иҗтимагый эшчәнлектән ерак булганнарны җәлеп итәргә омтылырга кирәк.

«Кемгәдер спорт, кемгәдер иҗат, кемгәдер фән якынрак. Һәм без балалар кечкенәдән үк үзләренә ошаганны таба алсын өчен төрле булырга тиеш. Әлбәттә, боларның барысы да туган якка – авылга, республикага һәм тулаем илгә мәхәббәт белән сугарылырга тиеш», – дип билгеләп үтте «Беренчеләр хәрәкәте» җитәкчесе.

Искәртик, Миңнеханов үз мөрәҗәгатендә «Беренчеләр хәрәкәте»нең республика бүлекчәсе потенциалын киңрәк файдаланырга, бу эшкә махсус хәрби операция ветераннарын – безнең заманның чын геройларын активрак җәлеп итәргә кирәклеген ассызыклады.

«Бөтен мөрәҗәгать үз халкына мәхәббәт белән сугарылган иде. Төп кыйммәт – кешеләр булуга басым ясалды. Предприятиеләрдә эшләүче кешеләр илгә көндәлек хезмәтләре белән ярдәм итә. Без Рөстәм Миңнехановның юлламасы вакытында залга чакырылучыларга мөрәҗәгать иткәнен күрдек. Анда халыкара мәйданда республика данын яклаган яшьләр дә, агросәнәгать өлкәсе хезмәткәрләре дә, фермерлар да, хезмәт династияләре дә, һәм, әлбәттә, Ватанны саклаучылар – махсус хәрби операциядә катнашучылар да, аларга ярдәм итүчеләр дә бар иде. Патриотлык һәм кешеләргә мөнәсәбәт мөрәҗәгатьнең асылы булды», - дип йомгаклады Тимур Сөләйманов.