Ләйлә Фазлыева Казанда «Мирас цифрда» Бөтенроссия конференциясендә чыгыш ясады
Kazan Digital Week кысаларында «Мирас цифрда» III Бөтенроссия фәнни-гамәли конференциясе башланды. Ачылу тантанасында Татарстан Мәдәни мирас объектларын саклау комитеты рәисе Иван Гущин һәм Татарстан Республикасы Премьер-министры урынбасары Ләйлә Фазлыева чыгыш ясады.
«Без сезнең белән «Мәгълүматлар икътисады һәм цифрлы трансформация» яңа илкүләм проекты бусагасында, аның кайбер параметрларын Россия Президенты Владимир Путин билгеләде. Ул билгеләп үткәнчә, аны гамәлгә ашыруга якынча 700 млрд сум акча юнәлдереләчәк. Яңа илкүләм проект «Цифрлы икътисад» программасының мантыйкый дәвамы булачак, аның эше агымдагы елда тәмамлана», — дип искәртте Иван Гущин.
Ул шулай ук мәдәни мирасны саклау өлкәсендә мәгълүмат технологияләрен кертүнең аерым нәтиҗәләре белән уртаклашты. 6 меңгә якын мәдәни мирас объекты, 13 тарихи җирлек дәүләт саклавында тора, шуларның икесе — федераль әһәмияттәге.
«Цифрлы дөнья турында сөйләсәк - бүген без барыбыз да шунда. Аннан башка үз тормышыңны һәм бигрәк тә эшеңне күз алдына китерү кыен, чөнки зур мәгълүматлар белән эшләргә, булган мирасны системага салырга һәм аны цифрлаштырырга кирәк», — диде Ләйлә Фазлыева.
Татарстан вице-премьеры республиканың ведомствоара структураларының үзара багланышларын билгеләп үтте. Сүз югары уку йортлары белән Дәүләт теркәве, кадастр һәм картография федераль хезмәте, дәүләт хакимияте һәм җирле үзидарә органнары белән эшләү турында бара.
Әлеге хезмәттәшлекнең нәтиҗәләреннән берсе - Бердәм күчемсез милек реестрын мәдәни мирас объектлары һәм аларның территорияләре турында тулы һәм төгәл белешмәләр белән 100 процент тулыландыру.
«Тагын бер кат кабатлыйм, мондый очрашулар нәтиҗәләр турында хәбәр итү өчен түгел, ә барыннан да элек, эшебездә кулланырга мөмкин булган фикерләр һәм практикалар белән уртаклашу өчен кирәк», — дип йомгаклады Фазлыева.
Республиканың мәдәни мирасын саклау өлкәсендә «цифрлаштыруны» ачык аңлау өчен КФУның Дизайн һәм пространство сәнгате институты Заманча технологияләр күргәзмәсе үткәрде.