М12 трассасы ачылганнан соң Татарстанда автотуристлар саны 88 процентка арткан

М12 «Көнчыгыш» трассасы ачылганнан соң, агымдагы елның язгы-җәйге чорында Татарстанга килүче автотуристлар саны 88 процентка арткан. Ел азагына кадәр республикада якынча 1 миллион кунак булып китәргә мөмкин, дип хәбәр итә «Автодор» дәүләт компаниясе матбугат хезмәте.

«Автодор» идарәсе рәисе Вячеслав Петушенко ТР Премьер-министры Алексей Песошин һәм республиканың транспорт һәм юл хуҗалыгы министры Фәрит Хәнифов белән Татарстан территориясендә юл челтәрен үстерү планнары турында фикер алышты.

Очрашу барышында яклар билгеләп үткәнчә, яңа трасса Татарстанның социаль-икътисади үсешенә этәргеч булды. Магистраль буенча хәрәкәт ачылганнан соң, икътисадка инвестицияләр кертү исәбенә территорияләр актив үсә башлады. Бу яңа эш урыннары булдыруга ярдәм итә.

Моннан тыш, хәзер йөк ташу күпкә арзанрак, тизрәк һәм иминрәк. Моннан тыш, М12 трассасы төбәкара элемтәләрне үстерү һәм республиканың туристик потенциалын ачуга көчле этәргеч бирде.

М12 «Көнчыгыш» трассасын төзү проектын гамәлгә ашыру дәвам итә. РФ Президенты Владимир Путин кушуы буенча юлны Казаннан Екатеринбургка һәм Төмәнгә кадәр озайту буенча актив эш алып барыла, дип ышандырдылар «Автодор»да.

М12 «Көнчыгыш» федераль трассасы тугыз төбәк аша уза. Шул исәптән Татарстан территориясе аша да. Мәскәүдән Төмәнгә кадәр магистральнең гомуми озынлыгы 1961 километрны тәшкил итәргә тиеш. 2023 елның 21 декабрендә Владимир Путин видеоэлемтә аша трассаның Мәскәүдән Казанга кадәр 810 километр озынлыктагы участогын ачты. М12 төзелеше «Транспорт инфраструктурасын модернизацияләү» илкүләм проекты буенча алып барыла.