Тыгин Түбән Камада торак инспекциясенең яңа җитәкчесен тәкъдим итте

Түбән Кама районара торак инспекциясендә җитәкче алмашынды. Бу вазифада Алмаз Гыйззәтуллин эшләячәк, ул элек Түбән Кама районы Советы аппаратын җитәкләгән иде. Татарстан Дәүләт торак инспекциясе башлыгы Александр Тыгин Гыйззәтуллинны Түбән Кама Советлар йортында эшлекле дүшәмбедә тәкъдим итте.

Тыгин билгеләп үткәнчә, шәһәр мэры белән алар ышанычлы алмаш сайлаган. «Без ышанычлы алмаш сайладык. Гыйззәтуллин беренче көн генә эшләми, Чаллыда стажировка узган. Без мондый форманы сайладык. Башта белгечләрне сынап карыйбыз, аннары билгелибез», - дип сөйләде Тыгин.

Алмаз Гыйззәтуллин Казан дәүләт университетын «юриспруденция» белгечлеге буенча тәмамлый, Россия Федерациясе Президенты каршындагы Россия Халык хуҗалыгы һәм дәүләт хезмәте академиясендә «дәүләт хезмәте һәм илкүләм иминлек» белгечлеге буенча укый. Татарстан адвокатлар коллегиясе филиалы җитәкчесе булып эшли.

Түбән Кама мэры Рамил Муллин бу вазифада 20 елга якын эшләгән элеккеге җитәкче Наилә Ихсановага эше өчен рәхмәт белдерде. Аны республика Рәисе Рөстәм Миңнеханов карары белән «Фидакарь хезмәт өчен» медале, шулай ук район башлыгының Рәхмәт хаты белән бүләкләделәр.

«Кеше, барлык авырлыкларга да карамастан, хезмәт хакы бик югары булмаса да, торак инспекторы булу җаваплылыгын үз өстенә алды. Проблемалар һәрвакыт булды, әмма тулаем алганда торак фонды белән идарә итү, яңа технологияләр кертү өлкәсендә күп кенә яңа карарлар кертүдә Наилә Наримановнаның да хезмәте бар», — дип билгеләп үтте Муллин.