Казанда театр хезмәткәрләренең уртача хезмәт хакы бер елда 17 процентка арткан

Россиядә театраль сезон ачылу уңаеннан Авито Работа экспертлары платформада булган театрлар яки шоуларда эшләүне күздә тотучы вакансияләрне анализлаган. Нәтиҗәдә экспертлар 2024 елның җәендә иң күбе актерлык позицияләренә вакансияләр артуны ачыклаган. Ил буенча театрлар, төрле проектлар төшерүләр һәм шоулар өчен рольләр башкаручыларга ихтыяҗ узган елның шул ук чоры белән чагыштырганда 2 тапкырдан күбрәккә арткан (+114 процент).

Казанда исә театр хезмәткәрләренә тәкъдим ителә торган уртача хезмәт хакы 17 процентка арткан – тулы мәшгульлек булган очракта 85 354 сумны тәшкил иткән. Узган җәйдә эш бирүчеләр театр хезмәткәрләренә аена уртача 73 065 сум тәкъдим иткән булган.

Ил буенча эш бирүчеләр эшчәнлеген башлап килүче актерларга аена уртача 35 881 сум хезмәт хакы тәкъдим итә. Актерлар өчен вакансияләрдә еш кына хезмәт хакының иң аскы чиген күрсәтәләр. Бу аларның реаль кереме күп очракта проектка, рольгә һәм гонорар буенча шәхси килешүләргә бәйле булуы белән аңлатыла. Гонорар күләме исә берничә фактордан тора.

Россия эш бирүчеләрендә ихтыяҗ арту буенча икенче урында хореограф һөнәре тора. Быел җәен аларга ихтыяҗ бер елда 77 процентка арткан. Бу театрлар һәм шоу-программаларда музыкаль һәм бию куелышлары саны арту белән бәйле. Мондый белгечләр бию номерлары һәм куелышлар булдыру, шулай ук актерларны укыту өчен кирәк. Эшчәнлеген башлап килүче хезмәткәрләргә тәкъдим ителә торган уртача оклад суммасы аена 36 963 сумны тәшкил иткән.

Фотографлар ихтыяҗ дәрәҗәсе буенча өченче категория белгечләр булды. Аларга ихтыяҗ узган ел белән чагыштырганда 1,5 тапкырга (+53 процент) арткан. Театрлар һәм күңел ачу проектлары еш кына реклама материаллары, афишалар, репетицияләр һәм премьера күрсәтүләрен төшерү өчен фотографлар җәлеп итә. Әлеге позициядә эшләргә теләүчеләр 59 289 сумнан алып уртача окладка өметләнә ала.