«Татмедиа» массакүләм мәгълүмат чаралары «Бөтен Россия» форумында ун дипломга лаек булды

Ике массакүләм мәгълүмат чарасы Бөтенроссия журналистлар конкурсында беренче урыннарны яулады. «Татмедиа» АҖ массакүләм мәгълүмат чаралары «Бөтен Россия» XXVIII заманча журналистика форумы иҗади конкурсларында ун дипломга лаек булды.

«Татарстан» журналы «Татарстан миллионерлары» проектын тәкъдим итте һәм «Махсус проект» номинациясендә беренче урынны яулады. «Челнинские известия» газетасы «Социаль челтәрләрдә иң яхшы массакүләм мәгълүмат чарасы аккаунты» номинациясендә җиңүче дип табылды.

Шулай ук «Шәһри Казан» һәм «Ютазы таңы» («Татмедиа» АҖ филиаллары) газеталары да конкурс дипломантлары булды.

Россия Журналистлар берлеге секретаре Владимир Касютин сүзләренчә, конкурска бөтен Россиядән 700дән артык эш тәкъдим ителгән. «Махсус проект» номинациясенә 252, ә «Иң яхшы массакүләм мәгълүмат чарасы аккаунты» номинациясенә 98 гариза кабул иткәннәр.

Бүләкләү тантанасында шулай ук «Россиянең ун иң яхшы газетасы» конкурсы Татарстан дипломантлары – «Татмедиа» АҖ басмалары, «Лениногорские вести», «Челнинские известия», «Ютазы таңы», «Зеленодольская правда», «Нократ» басмалары билгеләп үтелде.

Россия Журналистлар берлеге рәисе Владимир Соловьев «Татмедиа»га «Бөтен Россия» форумында актив катнашканы өчен диплом тапшырды. Искәртик, «Татмедиа» форумда «Чаян» журналы 100 еллыгына һәм «Чаян» журналының сәяси карикатура конкурсына багышланган күргәзмәләр тәкъдим итте, шулай ук медиахолдингның иң яхшы тәҗрибәләрен презентацияләде.

Россия Журналистлар берлеге секретаре Роман Серебряный билгеләп үткәнчә, форум кысаларында «Татмедиа» тәҗрибәсе турында уңай фикерләр күп булган.

«Бу эшне дәвам итәчәкбез», - диде ул.