Түбән Новгородта «Без – татарлар» спартакиадасы 27-28 сентябрьдә була
27-28 сентябрьдә Түбән Новгородта милли спорт төрләре буенча II «Без – татарлар» спартакиадасы уза. Бу хакта Түбән Новгород өлкәсе татарларының төбәк милли-мәдәни автономиясе хәбәр итә.
Спартакиада «Түбән Новгород» стадионында үткәрелә.
Чараны оештыручылар – Бөтендөнья татар конгрессы, Түбән Новгород өлкәсе татарларының төбәк милли-мәдәни автономиясе һәм Түбән Новгород өлкәсе Спорт министрлыгы.
«Безгә Идел буеның 8 төбәгеннән яшьләр командалары киләчәк. Үзебезнең өлкә командасы да формалаштырыла», диелгән хәбәрдә.
Командалар арасында түбәндәге ярышлар була:
- капчык бәрешү
- гер күтәрү спорты
- көрәш
- таяк тарту
- аркан тарту
- уктан ату
- кул көрәштерү
- бер аякта килеш көрәшү
Рәсми бүләкләүдән соң барлык теләүчеләр өчен милли уеннар була. Тамашачылар каршында профессиональ һәм җирле артистлар чыгыш ясаячак. Милли тәм-томнар һәм атрибутикадан күргәзмә-сату оештырылачак, диелә хәбәрдә.