Пермьдә торак йортның беренче каты ишелгән

Пермьдә күп фатирлы йортның 36 кв.метрлы мәйданда подвалы һәм беренче каты ишелгән. Шәһәр мэры Эдуард Соснин Телеграм-каналында хәбәр иткәнчә, гадәттән тыш хәл аркасында 17 кеше эвакуацияләнгән.

«Клара Цеткин урамы, 13 адресы буенча урнашкан торак йортта 36 кв.м мәйданда подвал һәм беренче кат ишелеп төште. Бинадан 17 кеше эвакуацияләнде. Урында профильле урынбасар җитәкчелегендә оператив штаб җәелдерелгән, бинада коткаручылар эшли», - диелә хәбәрдә.

Фатир хуҗалары өчен 244-40-13 телефоны буенча кайнар элемтә эшли. Клара Цеткин урамы, 21 йортта эвакуацияләнгән халыкны урнаштыру мәсьәләләрен хәл итү өчен кабул итү пункты җәелдерелде. Якынча мәгълүматлар буенча, зыян күрүчеләр юк.

ТАСС мәгълүматлары буенча, гадәттән тыш хәл урынында шәхси составтан 30 кеше һәм 9 берәмлек техника , шул исәптән Россия гадәттән тыш хәлләр министрлыгыннан 8 кеше һәм ике берәмлек техника эшли. 12:00 сәгатьтә (Мәскәү вакыты белән 10:00 сәгатьтә) урында Пермь администрациясенең гадәттән тыш хәлләр һәм янгын иминлеге комиссиясенең планнан тыш утырышын уздыру планлаштырылган.