Рөстәм Миңнеханов: 5 ел эчендә Татарстанда IT-компанияләр кереме 2 мәртәбә артты

Күпьеллык системалы эш нәтиҗәсендә Татарстанда куәтле IT-тармак формалашты. Бу хакта Татарстан Рәисе Рөстәм Миңнеханов Kazan Digital Week халыкара форумының пленар сессиясендә белдерде.

«Республикада якынча 3,3 мең IT-компания гамәлдә, аларда 42 меңнән артык кеше эшли. Соңгы 5 елда аларның еллык кереме 2 тапкырдан арткан һәм 177 млрд сумга җиткән», — дип белдерде Миңнеханов.

Ул билгеләп үткәнчә, республикада өч IT-парк мәйданчыгы эшли һәм бүген алар тулысынча эш белән мәшгуль. IT-паркта барлыгы 546 резидент эшли һәм 6 мең эш урыны булдырылган.

Татарстан Республикасы Рәисе кайбер резидентларның Россия регионнары һәм дус илләр компанияләре белән уңышлы хезмәттәшлек итүен өстәде. Моннан тыш, алдынгы IT-карарлар белән резидентлар илебезнең әйдәп баручы IT-корпорацияләренең бер өлешенә әверелүнең уңышлы мисаллары бар.

Рөстәм Миңнеханов IT-инфраструктураның зур шәһәрләрдә генә булдырылмавын искәртте. Сәләтле яшьләрне җәлеп итү һәм аларга ярдәм итү максатыннан республиканың 20 районында муниципаль IT-мәйданчыклар ачылды.

«Россия IT-компанияләрен һәм белгечләрен Иннополис шәһәре җәлеп итә. Махсус икътисади зонаның ике мәйданчыгында 338 компания эшли, аларның инвестицияләре 174 млрд сумнан артып киткән, һәм монда 10 меңгә якын эш урыны булдырылган», — диде Миңнеханов.

Татарстан Рәисе искәрткәнчә, быел Иннополиста Идел буенда мәгълүматларны эшкәртү һәм саклауның «Росатом» дәүләт корпорациясе төзегән иң зур үзәге ачылды.

Ул шулай ук ил Хөкүмәтенә «Иннополис» МИЗда ике зур индустриаль парк: «ИнноПарк» һәм «Лаеш» паркы төзегән 1119 нчы карар өчен рәхмәт белдерде.