Ринат Садыйков Дәүләт Советына сайлауларда тавыш бирде: Җаваплылык көне

Татарстанның яшьләр эшләре буенча министры Ринат Садыйков ТР Дәүләт Советына депутатлар сайлауда катнашты. Бу хакта ведомство башлыгы үзенең телеграм-каналында язган.

«Бүген балачагым һәм яшьлек елларым истәлекләренә чумдым! Туган мәктәбемә, үземнең сайлау участогыма килдем! Элеккечә, бүген дә якшәмбе, сайлау көнендә сине ачык йөзле укытучылар каршы ала, музыка уйный, тәмле ризыклар ярминкәсенең кызган чагы!» - диде министр.

Сайлау көне – ул республикада яшәүче һәр яшь кешенең җаваплылыгы көне, дип ассызыклады ул. Министр шулай ук яшь сайлаучыларның иртәдән үк участокларга баруын һәм актив тавыш бирүен билгеләп үтте.

VII чакырылыш Татарстан Дәүләт Советына депутатлар сайлау бүген, 8 сентябрьдә уза. 50 депутат – партия исемлекләре, тагын 50се бермандатлы сайлау округлары буенча сайланачак. Үзәк сайлау комиссиясе биш сәяси партиянең исемлекләрен теркәде: «Яңа кешеләр», «ЛДПР – Россия либераль-демократик партиясе», «Гадел Россия – Патриотлар – Дөреслек өчен», «Бердәм Россия», «КПРФ – Россия Федерациясе Коммунистлар партиясе».

Моңарчы «Татар-информ» ТР Рәисе Рөстәм Миңнеханов һәм ТР Дәүләт Советы Рәисе Фәрит Мөхәммәтшин сайлауда үз тавышын бирде, дип хәбәр итте. 12:00 сәгатькә Татарстан Дәүләт Советына сайлауларда сайлаучыларның 32,2 проценты тавыш биргән.