Миңнеханов гроссмейстер Артемьевны Көнчыгыш икътисади форум кубогында җиңүе белән котлады

Татарстан Рәисе Рөстәм Миңнеханов Көнчыгыш икътисади форумы кубогына ия булган гроссмейстер Владислав Артемьевны котлады.

«Европа чемпионы, ике тапкыр Россия чемпионы, Көнчыгыш икътисади форум кубогына III Халыкара шахмат турниры җиңүчесе - бу җиңүләрнең барысы да Владислав Михайловичның таланты һәм максатчанлыгы, шулай ук Татарстан Шахмат федерациясенең спортчыга актив ярдәме нәтиҗәсендә яуланды. Сезнең бердәм, актив хезмәтегез, аның тәэсирле нәтиҗәләре ихлас хөрмәткә лаек», - дигән котлау телеграммасында республика җитәкчесе.

Ул Татарстан Шахмат федерациясе вице-президенты Геннадий Захаровка аерым рәхмәт белдерде һәм аның төбәктә әлеге интеллектуаль спорт төре үсешенә керткән зур өлешен билгеләп үтте.

Кичә билгеле булганча, Кубок өчен финал бәйгесендә Артемьев Россия спортчысы Павел Понкратовны җиңде. Бронза медальгә Россиянең иң яшь гроссмейстеры Иван Землянский лаек булды.