Чүпрәленең Дуван авылы умартачысы бал кортлары оялары өстендә йоклый торган апиөй ясаган

Чүпрәле районы Дуван авылында яшәүче умартачы Марат Исхаков апиөй ясаган. Аларда умарта кортлары оялары өстендә йокларга мөмкин. Бу хакта «Туган як» сайтында Римма Мәүлетова яза.

Апиөйләр елга буена, табигатьнең бик матур урынына урнашкан, тирә-якта яшеллек, чәчәкләрдән, үләннәрдән хуш ис аңкып тора. Шул хозурлык эчендә ике кечкенә агач өйчек утыра. Такталардан ясалган икешәр сәке урнаштырылган монда. Өсләрендә матраслар бар, кечкенә мендәрчекләр куелган. Сәкеләр астында исә умарта оялары. Бер өйчектә 8 оя. Әлеге ояларга бал кортлары урам яктан кереп-чыгып йөриләр. Өй эчен балавыз, прополис, бал корты ипие (перга), чәчәк серкәсе исләре биләп алган.

«Әлеге өйчекләрдә май аеннан август ахырына кадәр кортлар безелдәвен тыңларга була. Бал кортлары эшчәнлеге нәтиҗәсендә барлыкка килгән тибрәнү стрессны бетерә», - ди тәҗрибәле умартачы Марат Исхаков. Белгечләр исә апитерапиянең (умарта кортлары өстендә йоклауның) йөрәк авырулы, баш авытуы белән интегүче кешеләргә, төнлә йоклый алмаучыларга бик тә файдалы икәнлеге турында әйтәләр, стрессны бетерергә дә, депрессиядән чыгарга да ярдәм итә, диләр.

«Төрле төбәктәге умартачылар белән тәҗрибә уртаклашып, очрашып та, шалтыратышып та торабыз. Шундый очрашуларның берсендә апиөйләр белән танышып кайттым. Кайткач ук төзеп куйдым, умарта кортлары ояларын урнаштырдым һәм бөтен гаиләбез белән сынап карый башладык. Бик ошады. Һәм райондашларыбыз өчен дә шундый ук сихәт бирүче өйчекләр төзеп кую хыялы белән яна башладым», - ди Марат Исхаков.

- Танышларыннан ишетеп тә, интернет аша белеп тә шалтыраталар. Килергә теләгәннәр күп. Ә апиөйләрнең ишекләре һәркемгә ачык, – ди ул.