Россиядә Белем көнендә укучыларның әти-әниләренә ял бирергә тәкъдим иттеләр

Россиядә Белем көнен укучыларның әти-әниләре өчен ял көне итәргә тәкъдим иттеләр. Закон проектын 29 августта Дәүләт Думасына керттеләр, дип хәбәр итә «Гадел Россия – Дөреслек өчен» фракциясе җитәкчесенең беренче урынбасары Дмитрий Гусев.

«Белем көне – укучыларның әти-әниләре өчен ял көне. Мондый закон проектын бүген безнең лидер Сергей Миронов һәм фракция буенча коллегам Яна Лантратова белән бергә Дәүләт Думасына керттек», - дип яза парламентарий телеграмм-каналында.

Гусев билгеләп үткәнчә, 1 сентябрь һәр ата-ана өчен иң мөһим көннәрнең берсе булып тора.

«Чын мәгънәсендә гаилә бәйрәме. Бигрәк тә баласын беренче тапкыр беренче сыйныфка озатучылар өчен. Балалар өчен линейкада әти-әниләре белән бергә булу мөһим», - дип ассызыклый спикер.

Депутат сүзләренчә, мәктәп укучыларының ата-аналарына ял көнен биргәндә хезмәт хакы сакланачак, дип тәкъдим ителә.

«Мондый көнне гаиләләр бергә булырга тиеш!», - дип өстәде фракция җитәкчесе урынбасары.