Ադրբեջանը և Ուկրաինան փոխադարձ աջակցություն են ցուցաբերում տարածքային ամբողջականության և ինքնիշխանության հարցերում․ Ալիևը շնորհավորել է Զելենսկիին
Ադրբեջանն ու Ուկրաինան կապում են հարուստ ավանդույթներով բարեկամական հարաբերությունները։ Այս մասին Ուկրաինայի ազգային տոնի՝ Անկախության օրվա կապակցությամբ նախագահ Վլադիմիր Զելենսկիի ուղղված շնորհավորական ուղերձում գրել է Ադրբեջանի նախագահ Իլհամ Ալիևը։
«Ադրբեջանը և Ուկրաինան փոխադարձ աջակցություն և համերաշխություն են ցուցաբերում տարածքային ամբողջականության և ինքնիշխանության հարցերում՝ ՄԱԿ-ի Կանոնադրությանը, միջազգային նորմերին ու սկզբունքներին համապատասխան։ Մտադրություն ենք արտահայտում հետագայում ևս գործադրել բոլոր ջանքերը Ուկրաինայի բարեկամ ժողովրդին անհրաժեշտ հումանիտար աջակցություն և օգնություն ցուցաբերելու համար»,- ասված է Ալիևի նամակում։
Ադրբեջանի նախագահը նաև վստահություն է հայտնել, որ Կիևն ու Բաքուն հաջողությամբ կշարունակեն համատեղ ջանքերը՝ ուղղված «ադրբեջանա-ուկրաինական բարեկամության և հուսալի գործընկերության ամրապնդմանը և համագործակցության ընդլայնմանը»: