Հայոց պետականությունն Արցախի և Հայաստանի Հանրապետությունների վերամիավորումն ուղենիշ հռչակող պետությունն է, այդ ընթացքից չենք շեղվելու. Արթուր Խաչատրյան  

Անկախության հռչակագիրը ոչ միայն սկիզբ դրեց հայոց անկախ պետականության վերականգմանը, այլ նաև ուղենշեց այն հիմնական քաղաքական կետերը, սկզբունքները, որոնց հիման վրա կառուցվեց Հայաստանի անկախ Հանրապետությունը: Այս մասին ՀՀ Անկախության Հռչակագրի 34-րդ տարեդարձին նվիրված հավաքին հայտարարեց ՀՀ ԱԺ «Հայաստան» խմբակցության պատգամավոր Արթուր Խաչատրյանը:

Նրա խոսքով՝ այդ Հանրապետությունը, որի կործանմանը տանում են այսօրվա իշխանությունները, մի քանի հիմնական սկզբունք ուներ: «Առաջինը համահայկական նպատակների իրականացումն էր: ՀՀ-ն միայն 29,742 քկմ վրա ապրող հայերի և հայաստանցիների հայրենիքը չէ. հռչակվեց, որ դա համայն հայության հայրենիքն է: Դրանից բացի, ամենակարևորը՝ այս պետության հիմքը 1989 թվականի դեկտեմբերի 1-ի որոշմամբ ստեղծված պետությունն էր: Այս ՀՀ-ի հիմքը Հայաստանի և Լեռնային Ղարաբաղի Հանրապետություններն էին, դա է եղել մեր պետության հիմքը»,-ասաց նա:

Խաչատրյանն ընդգծեց՝ այսօր, Հայաստանի իշխանությունները, փորձելով սեպ խրել այս երկու պետությունների արանքում, սեպ խրել Հայաստանի, Արցախի և սփյուռքահայության միջև, նպատակ ունեն պառակտել մեր ազգը, գլոբալիզացիայի հոսանքների գերի դարձնել և վերջիվերջո ջնջել հայկականությունը:

«Ասօր, նշելով ՀՀ անկախության հռչակագրի 34-ամյակը, մենք ուղերձ ենք հղում՝ ո՛չ, հայ ժողովուրդն ունի համահայկական նպատակներ, հայոց պետականությունն Արցախի Հանրապետության և Հայաստանի Հանրապետության վերամիավորումը ուղենիշ հռչակող պետությունն է և այդ ընթացքից հնարավոր չէ մեզ շեղել»,-նշեց նա: