2024 елда иң перспективалы эшне атадылар

Бүгенге көндә иң перспективалы һөнәр булып дата-сайентист, программист һәм DevOps-инженер кебек IT-өлкә һөнәрләре, шулай ук кадрлар кытлыгы сәбәпле эшче белгечлекләр санала, дип хәбәр иткән «РИА Новости»га «Headhunter»ның хезмәт базары буенча баш эксперты Наталья Данина.

«Иң югары түләнә торган белгечлекләр исемлегендә беренче урыннарда it-өлкә һөнәрләре тора. Бу дата-сайентистлар, уйлап табу төркеме җитәкчеләре һәм DevOps-инженерлар. Бу өлкәдә шулай ук ихтыяҗ зур булган белгечлекләр булып программистлар, белешмәләр аналитиклары, IT-проектлар җитәкчеләре, техник ярдәм белгечләре, тестлаучылар, система администраторлары, киберкуркынычсызлык буенча белгечләр, система аналитиклары тора», — диде ул.

Шул ук вакытта IT-өлкәдә хезмәт базары баланслы түгел, дип билгеләп үтте Данина. Квалификацияле белгечләр җитми, ә «джуниор»-белгечләр арасында югары конкуренция күзәтелә. Бу алар өчен вакансияләр санының чикле булуы белән бәйле. Хәзер компанияләр «джуниор» һәм «мидл»лар өчен адаптацияләү һәм өстәмә укыту программаларын ешрак кертә башлады. Бу аларны катлаулырак бурычларга әзерләү һәм бизнес өчен аларның кыйммәтен арттыру өчен эшләнә.

«Соңгы вакытта Россиядә эшче белгечлекләргә тренд күзәтелә... Эшче һөнәрләргә күчү теләге, шул исәптән, әлеге өлкәдә кадрлар кытлыгы күзәтелүе белән аңлатыла, ә бу исә хезмәт хаклары артуга һәм эш эзләү вакыты кыскаруга китерә», — дип аңлатты эксперт.

Аның мәгълүматлары буенча, эшче белгечлекләрдә эш эзләүчеләр арасында хәзерге вакытта иң түбән конкуренция — бер вакансиягә нибары ике резюме туры килә. Бу башка өлкәләргә караганда шактый азрак. Бүгенге көндә иң кызыклы эшче һөнәрләр булып кондитер, икмәк пешерүче, пешекче, тегүче, электрик, автомеханик, конвейер операторы, балта остасы һәм машинист һөнәрләре санала.