Япония яр буенда көчле җир тетрәүдән соң цунами кузгалган

Япониянең Кюсю утравы янындагы көчле җир тетрәүдән соң Миядзаки префектурасы яр буендагы цунаминың биеклеге бер метрга җиткән. Бу хакта РИА Новости агентлыгы NHK телеканалына сылтама белән хәбәр итә.

Телеканал дикторы билгеләп үткәнчә, яр буенда 50 сантиметрга якын биеклектәге дулкын күзәтелгән. Телеканал мәгълүматлары буенча, Сикоку утравындагы Эхимэ префектурасы яр буенда исә дулкынның биеклеге бер метрга җитәр дип көтелә.

Кюсю утравының көньяк-көнчыгыш яр буенда җирле вакыт белән 16.43 сәгатьтә (Мәскәү вакыты белән 10.43 сәгатьтә) куәтле җир тетрәү булган. Җир тетрәү үзәге Тын океан бассейнындагы Хюга-Нада диңгезендә су астында 30 километр тирәнлектә урнашкан.

Башта җир тетрәү магнитудасы 6,9ны тәшкил иткән, аннары ул 7,1гә кадәр күтәрелгән. Миядзаки һәм Кагосима префектураларында биш баллга кадәр җир асты селкенүләре күзәтелгән. Зыян күрүчеләр һәм җимерелгән объектлар хакында әлегә мәгълүмат юк.

Җир тетрәүдән соң Кюсю утравының көнчыгыш яр буе, шулай ук Сикоку утравының көнбатыш һәм көньяк яр буе өчен цунами куркынычы игълан ителгән.