Россия мөселманнары Диния нәзарәте Казанда ислам яшүсмерләр уеннарын үткәрүне хуплады

Мәскәүдә ТР Олимпия Советы рәисе Марат Бариев Россия Федерациясе мөселманнары Диния нәзарәте рәисе, мөфти Равил Гайнетдин белән очрашты. Анда яклар Ислам хезмәттәшлек оешмасының I Яшүсмерләр уеннарына әзерлек мәсьәләләре хакында фикер алышты, ул 2025 елда Казанда узарга тиеш. Бу хакта «Татар-информ» агентлыгына ТР Олимпия Советы матбугат хезмәтендә хәбәр иттеләр.

«Равил Гайнетдин ике ел элек үк мондый ярышларны Татарстан башкаласында үткәрүне хуплаган иде, бүген ул шулай ук Уеннарны оештыру мәсьәләсенә карата уңай фикерен белдерде», - дип аңлатма бирде Марат Бариев очрашу нәтиҗәләренә.

Быелның июнендә, РФ Дәүләт Думасының Физик культура һәм спорт комитеты күчмә утырышында комитетның барлык әгъзалары да Татарстанда Ислам яшүсмерләр уеннарын үткәрү тәкъдимен бертавыштан хуплады.

Ислам яшүсмерләр уеннары – ул халыкара мультиспорт ярышлары, анда Ислам хезмәттәшлек оешмасы илләренең 14-16 яшьлек спортчылары катнаша. Ярышлар программасына спортның 21 төрен кертергә ниятлиләр.