Сентябрьдә Казан – Шанхай рейсы ачыла

28 сентябрьдә атнасына өч тапкыр Казан – Шанхай рейсы эшли башлый. Бу хакта «Казан» Халыкара аэропортыннан яңа юнәлешне тәкъдим итүдә билгеле булды.

«Казан – Шанхай күпере башында авиакомпаниягә туристлар күләмен арттырырга ярдәм итүегезне сорыйм. Алга таба үсеш шуңа бәйле булачак. Әгәр дә без бу рейста самолетларның тулуын күрсәтсәк, безгә Пекинга, Кытай Халык Республикасының башка зур шәһәрләренә, сәнәгать һәм туристлык шәһәрләренә рейслар куячаклар. Шуның белән безнең кешеләр, безнең туристлар Мәскәү аша баруга караганда Кытайга тизрәк эләгәчәк», – дип мөрәҗәгать итте Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Олег Коробченко.

Даими рейсны China Eastern Airlines авиакомпаниясе башкарачак. Ул Кытай дәүләт авиакомпанияләренең беренче өчлегенә, дөньяның иң зур авиакомпанияләре унлыгына керә, ул ел саен 130 миллионнан артык пассажир йөртә.

Казан Россиядән Шанхайга China Eastern Airlines рейсы белән барып була торган өченче шәһәр булачак. Татарстан башкаласыннан тыш, China Eastern шулай ук Шанхайга Мәскәүдән һәм Санкт-Петербургтан рейслар башкара.

Казан – Шанхай маршруты буенча рейслар киң фюзеляжлы 264 урынлы Airbus A330 һава судноларында атнага өч тапкыр башкарылыр дип планлаштырыла.