Татарстан Дәүләт Советына сайлауда бюллетеньдә исемлектә партияләр тәртибен билгеләделәр

Татарстан Республикасы Үзәк сайлау комиссиясендә жирәбә үткәрелде, аның барышында ТР Дәүләт Советы депутатларын сайлауда бердәм республика сайлау округы буенча тавыш бирү өчен бюллетеньдә сәяси партияләрнең атамаларын урнаштыру тәртибе билгеләнде. Бу турыда «Татар-информ» яза.

«Бердәм Россия» партиясенең төбәк бүлеге вәкиле Марат Сәмигуллин йомгаклау бюллетенендә – дүртенче номерны, «Гадел Россия – Патриотлар – Дөреслек өчен» партиясе вәкиле Елена Сбитнева – өченче номерны, ЛДПР партиясенең Татарстан төбәк бүлегеннән Руслан Йосыпов икенче номерны алды. Бишенче номер КПРФ партиясенең Татарстан төбәк бүлегенә булды, ә «Яңа кешеләр» партиясенең Татарстан төбәк бүлеге вәкиле Павел Блага беренче номерны алды.

Татарстан парламенты депутатларын сайлауда барлыгы алты сәяси партия катнаша. Биш партия («Бердәм Россия», КПРФ, «Гадел Россия – Патриотлар – Дөреслек өчен», ЛДПР һәм «Яңа кешеләр») бердәм округ буенча да, бермандатлы округларда да кандидатлар күрсәтте.

Тагын бер партия - «Гражданнар инициативасы» - берничә бермандатлы округта үз кандидатларын тәкъдим итте. Моннан тыш, бермандатлы округларда 12 кеше үзен-үзе күрсәтте. Хәзерге вакытта кандидатларны теркәү процессы бара.

Бердәм тавыш бирү көнендә, 2024 елның 8 сентябрендә, җиденче чакырылыш республика Дәүләт Советы депутатларын сайлау, шулай ук 38 муниципаль берәмлектә җирле үзидарә органнары депутатларын өстәмә сайлау була.

Илле депутатны – партия исемлекләре, тагын иллесен бермандатлы округлар буенча сайлыйлар. Сайлауда катнашу өчен 427 кеше кандидатурасын күрсәтте: 179 кеше – бердәм республика округы буенча, 248 кеше – бермандатлы округларда.