Татарстан аграрийлары начар һава шартларында урып-җыю эшләре турында сөйләде

Һава торышының кискен үзгәрүенә карамастан, Татарстанда июль уртасында башланган урып-җыю кампаниясе дәвам итә. Бүгенгә 1,3 млн гектарның 194,4 мең гектарыннан уңыш җыеп алынган.

Узган ел корылык булуга карамастан, игенчеләр Татарстанны мул уңыш белән тәэмин итә алды – 3,7 миллион тонна ашлык суктырып алдылар. Быел урып-җыю кампаниясе башланганнан бирле һава торышы яхшы булды, әмма кояшлы көннәр тиз арада начар һава торышы белән алышынды.

Июльнең соңгы көннәрендә көчле яңгыр, боз яуды. Бу басуда эшләүгә тискәре йогынты ясый, шулай ук ашлыкның сыйфатын начарлата, аның дымлылыгын арттыра.