Рөстәм Миңнеханов «Рубин»га: Төп үтенеч – ахырга кадәр көрәшегез

Казанның «Рубин» футбол клубы Санкт-Петербургның «Зенит» командасына җиңелгәннән соң, Татарстан Рәисе Рөстәм Миңнеханов уенчылары һәм тренерлар штабы белән очрашты. Очрашу команданың клуб базасында узды, дип яза республика җитәкчесенең матбугат хезмәте.

Рөстәм Миңнеханов узган сезонда футболчыларның тотрыклы һәм ышанычлы уен күрсәтүен әйтте. «Рубин» футбол клубы һәм Татарстан Республикасы – икесе бербөтен. Без барыбыз да сезнең җанатарлар. Узган сезон өчен сезгә рәхмәт әйтәсем килә. Бу коллективның: уенчыларның, тренерлар составының һәм команда җитәкчелегенең зур хезмәте», – диде ул.

Татарстан Рәисе Россия премьер-лигасының киләсе сезонында спортчыларга уңышлар теләде. «Җиңүләр һәм уңышсызлыклар булса да, без сезнең белән. Төп үтенеч – ахырга кадәр көрәшегез. Хәтта җиңелгәндә дә, көрәшүне дәвам итү – оят түгел, бу – спорт. Киләсе сезонда уңышлы чыгыш ясавыгызны, кызыклы уен, шулай ук имгәнүләрнең аз булуын телим. Очрашуга бик шатмын», – диде ул.

«Рубин» футбол клубы президенты Марат Сафиуллин республика җитәкчелегенә командага ярдәме өчен рәхмәт әйтте. «Безнең очрашуларның традицион булуына шатбыз. Узган елда сез шушы залда командага үгет-нәсыйхәт бирдегез һәм бу уенчыларның уңышлы чыгышына көчле этәргеч булды. Сезнең безнең белән булуыгызга, безнең команда белән яшәвегезгә, аның уены белән кызыксынуыгызга рәхмәт. Бу безнең өчен зур җаваплылык», – диде ул.

«Сезнең ярдәм белән без узган сезонда яхшы спорт нәтиҗәләренә ирешеп кенә калмыйча, бик күп яхшы социаль проектларны гамәлгә ашырдык. Безнең горурланыр нәрсәбез бар. Без футбол кырларын реконструкцияләдек, манеж һәм спорт үзәге төзибез. Бу проектлар тәмамланганнан соң «Рубин» футбол клубы инфраструктурасы Премьер-лигада иң яхшыларның берсе булачагына ышанам», – дип өстәде Сафиуллин.

«Команданы көйлибез: без характерыбызны күрсәтергә, һәр уенда үзебез, клуб өчен, республика өчен көрәшергә тиеш. Без алга таба барырга, кырга чыгарга һәм фидакарьлек белән уйнарга телибез», – дип ышандырды «Рубин»ның баш тренеры Рәшит Рәхимов.

Футболчылар да Татарстан җитәкчелегенә ярдәмнәре һәм уенчыларга максималь уңайлы шартлар тудырулары өчен рәхмәт белдерде. Рөстәм Миңнехановка фамилиясе язылган клуб футболкасы һәм «Рубин» билгесе тапшырдылар.