Казан яшәү бәясе иң кыйммәт булган экскурсия шәһәрләре исемлегенә кергән

Татарстан башкаласы экскурсия туризмы өчен яшәү бәясе иң югары булган Россия шәһәрләре арасына кергән. Шәһәрдә урнашуның уртача бәясе бер төнгә 5,9 мең сум тәшкил итә – бу Мәскәү һәм Санкт-Петербург белән бер дәрәҗәдә, дип хәбәр итә ТАСС агентлыгы Туристик агрегаторлар ассоциациясенә сылтама белән.

«Островок» сервисы мәгълүматларыннан күренгәнчә, яшәү буенча иң кыйммәтле экскурсия юнәлеше – Плес (9,4 мең сум), шуннан соң Зеленоградск (8,3 мең), Суздаль (7,9 мең) һәм Выборг (6,1 мең) шәһәрләре килә.

Иң арзан шәһәрләргә килгәндә, Брянск (бер төн – 3,7 мең сум), Калуга (3,8 мең), Новосибирск (4,1 мең), Владимир һәм Тверьне (4,2 мең) атап үтәргә мөмкин.

Туристик агрегаторлар ассоциациясендә билгеләп үтүләренчә, бу җәйдә Адлер, Абрау-Дюрсо һәм Ялта пляжда ял итү өчен – иң кыйммәтле, ә Керчь, Судак һәм Феодосия иң арзанлы урыннар булган. Шифаханәдә ял итү өчен иң бюджетлы юнәлешләр – Ставрополь краеның курорт-шәһәрләре, актив ял итү өчен юнәлешләр – Калмыкия һәм Коми.

Россия буенча тулаем алганда торак белешеп куюның уртача бәясе бер ел эчендә 15 процентка арткан һәм 6 мең сум тирәсе тәшкил иткән.