Татарстаннан ике мәктәп директоры «Россиядә ел директоры» бәйгесе финалына узган

2024 елгы «Россиядә ел директоры» Бөтенроссия һөнәри бәйгесенең сайлау алу туры тәмамланды. Нәтиҗәләр буенча Россиянең 22 төбәгеннән мәгариф оешмаларының 30 җитәкчесе финалга чыкты. Алар арасында Татарстаннан ике мәктәп директоры бар. Болар – Казанның 179 нчы гимназия директоры Эльвира Наумова һәм Мамадыш шәһәренең 2 нче лицей – мәгариф үзәге директоры Салават Гыймранов. Бу хакта республиканың Мәгариф һәм фән министрлыгы хәбәр итә.

Быел бәйгедә катнашу өчен Россиядәге мәктәп директорларыннан 700дән артык гариза килгән.

Бәйге финалистлары көз башында йомгаклау этабында күрешәчәк. Беренче тур Калугада була, монда узган елгы бәйге җиңүчесе Алексей Мокрушин яши һәм эшли. Бу этапта катнашучыларны «Траектория движения» һәм «За и против» сынаулары көтә, йомгаклар буенча биш лауреат ачыкланачак.

Йомгаклау этабының икенче туры Мәскәү өлкәсендә «Взлет» Мәгариф өлкәсендә була.

Йомгаклау этабының беренче һәм икенче турларында иң күп балл җыйган лауреат «Россиядә ел директоры» бәйгесе җиңүчесе була. Баллар саны буенча икенче һәм өченче урынга лаек булган ике конкурсант бәйге призерлары була.

Бәйге сынауларыннан тыш, йомгаклау этабында финалистлар өчен мәдәни программа да планлаштырылган, шулай ук алар бәйгене кабул итүче төбәкләрдәге белем бирү системасы белән дә танышачак.

«Россиядә ел директоры» бәйгесе җиңүчесен һәм призерларын Мәскәүдә Дәүләт Кремль сараенда, 5 октябрьдә узачак тантаналы чарада игълан итәчәкләр.