Мәктәпләр өчен Татарстан флаглары һәм герблары алырга 80 млн сум бүлеп биреләчәк

Республиканың гомуми белем бирү оешмалары өчен Татарстанның дәүләт символларын сатып алуга 80 млн сумнан артык акча бүлеп биреләчәк. Бу хакта мәгълүмат Дәүләт сатып алулары порталында тендер материалларында басылып чыкты.

Документларга ярашлы, флагшток өчен 1,1 меңнән артык ТР флаг комплекты һәм флагштоклар, ТР флаглары белән өстәл флагштоклары, ТР протокол флаглары, шулай ук Татарстанның зур һәм кече герблары кирәк булачак.

Дәүләт символларын зур шәһәрләр, мәсәлән, Казан һәм Чаллы мәктәпләре өчен генә түгел, ә республика районнарындагы авыл гомуми белем бирү учреждениеләре өчен дә сатып алачаклар.

Заказчы булып Татарстан Мәгариф һәм фән Министрлыгы тора. Тапшыру контракт төзелгәннән соң 90 көн эчендә башкарылырга тиеш.