Рөстәм Миңнеханов Екатеринбургта Таҗикстан Премьер-министры белән очрашты

Татарстан Рәисе Рөстәм Миңнеханов Таҗикстан Республикасы Премьер-министры Кохир Расулзода белән очрашты. Аларның очрашуы Екатеринбургта узды, хәзер биредә «Иннопром-2024» Халыкара сәнәгать күргәзмәсе уза. Бу хакта ТР Рәисенең матбугат хезмәте җитәкчесе Лилия Галимова хәбәр итә.

Миңнеханов билгеләп үткәнчә, Россия һәм Таҗикстан лидерларының даими диалогы, шулай ук үзара сәфәрләр төбәкара дәрәҗәдә эшләү өчен искиткеч шартлар һәм мөмкинлекләр тудыра.

Ул Татарстан һәм Таҗикстан арасында товар әйләнеше артуын һәм 2023 ел нәтиҗәләре буенча 36 миллион доллар тәшкил итүен искәртте. Шуңа да карамастан, потенциал бар әле, дип саный Миңнеханов.

«Безнең кайбер предприятиеләр Таҗикстанга үз продукциясен чыгара. Без булган мөмкинлекләрдән тулысынча файдаланмыйбыз дип уйлыйм. Сәүдә-икътисад өлкәсендә үзара бәйләнешләрне активлаштырырга кирәк. Безнең предприятиеләр линиясе буенча хезмәттәшлекне үстерү мөһим», - дип уртаклашты Миңнеханов үз фикере белән.

Өстенлекле юнәлешләр арасында ул машина төзелеше, нефть химиясе, авыл хуҗалыгы, сәламәтлек саклау һәм мәгълүматлаштыруны билгеләп үтте.

Расулзода, үз чиратында, теләсә кайсы урында Миңнеханов белән очрашуга бик тә шат булуын әйтте.

«Сез – безнең кеше. Таҗикстан Президенты исеменнән зур рәхмәт әйтәсем килә. Ул сезгә аерым хөрмәт белән карый», - диде республика Премьер-министры.

Яклар республикаларга барлык дәрәҗәләрдә хезмәттәшлек итү мөһим дигән нәтиҗәгә килде. Таҗикстан делегациясе Киләчәк Уеннарында, БРИКС Уеннарында, БРИКС шәһәрләре мэрлары форумында катнашты.

«Татарстанда теләсә нинди дәрәҗәдәге вакыйгалар үткәрелә. Чөнки Сез барысын да иң югары дәрәҗәдә оештыра беләсез», - дип искәртте Расулзода.

ТР Рәисенең матбугат хезмәте фотосы