Казан май аенда ялгыз ял итү өчен популяр юнәлешләр унлыгына кергән

Казан май аенда ялгыз ял итү өчен популяр булган юнәлешләр рейтингының алтынчы баскычында урнашкан. Туристлар ТР башкаласында уртача өч төнгә туктала. Бу хакта Казан мэриясе матбугат хезмәте хәбәр итә.

Беренче урында – Санкт-Петербург. Броньланган кунакханәләрнең һәм фатирларның 13 проценты Россиянең мәдәният башкаласына туры килә. Икенче урында – Мәскәү (12 процент). Лидерлар өчлеген Сочи (11 процент) яба. Бишлеккә Калининград һәм Анапа кергән.

Май аенда бер кешегә броньлар саны, узган ел күрсәткечләре белән чагыштырганда, 10 процентка арткан, дип хәбәр итә «ТВИЛ.РУ» сервисы.

Исегезгә төшерәбез, май бәйрәмнәрендә ТР башкаласына 90 мең турист килгән иде. Кунакханәләрнең уртача йөкләнеше 83 процентны тәшкил итте.