Рөстәм Миңнеханов DoorHan концернына нигез салучы Александр Ханин белән очрашты

Бүген Татарстан Республикасы Рәисе Рөстәм Миңнеханов DoorHan концернына нигез салучы Александр Ханин белән хезмәттәшлек мәсьәләләре турында фикер алышты. Бу хакта республика җитәкчесенең матбугат хезмәте хәбәр итә.

ТР Хөкүмәте Йортында узган әңгәмә барышында яклар концернның Татарстанда агымдагы проектлары һәм яңа инвестиция проектларын гамәлгә ашыру турында фикер алышты.

DoorHan концерны сәнәгать предприятиеләре, шәхси йортлар, шәһәр инфраструктурасы һәм авыл хуҗалыгы өчен тулы комплектлы биналар җитештерүнең тулы циклын тәэмин итә. Ул төрле төбәкләрдә 26 җитештерү-склад комплексын, 54 сәүдә вәкиллеген һәм 32 заводны (барлыгы 6,1 мең эш урынын) үз эченә ала.

Татарстанда DoorHan концернының ике предприятиесе бар. Икесе дә республиканың Лаеш районында урнашкан. Бу 2013 елда Комлы Кавалда ачылган капка һәм роллет системалары, күчереп төяү җиһазлары һәм капкалар өчен автоматика җитештерү заводы һәм 2021 елда Столбищеда эшли башлаган тиз төзелә торган капиталь биналар, төзелеш металл конструкцияләре һәм шәхси торак төзелеше өчен йорт комплектлары җитештерү заводы.

Моннан тыш, узган 2023 елның язында шул ук Лаеш районында DoorHan концерны 500 мең квадрат метрдан артык гомуми мәйданлы логистик комплекс төзүгә кереште. Ул вакытта кирәкле инвестицияләр күләме 20 миллиард сумга бәяләнгән. Исәпләүләр буенча, мегаскладны булдыру 15-20 мең яңа эш урыны барлыкка килүен тәэмин итәчәк.

120 гектар мәйданда һәрберсе 50-55 мең квадрат метр мәйданлы ун корпус, шулай ук тулай тораклар, бизнес-үзәкләр, спорт мәйданчыклары, ашханәләр һәм оптималь хезмәт шартларын тәэмин итүче башка объектлар барлыкка килергә тиеш. Комплексның беренче чираты 2024 ел азагына төзелеп бетәчәк дип планлаштырылган.