Патрушев һәм Дюмин Путинның ярдәмчеләре итеп билгеләнде

РФ Иминлек советының элеккеге секретаре Николай Патрушев һәм Тула өлкәсе губернаторы Алексей Дюмин РФ Президентының ярдәмчеләре итеп билгеләнде. Владимир Путин бу турыдагы указларны үз администрациясендә имзалады, дип хәбәр итә Кремльнең матбугат хезмәте.

Алексей Дюмин 2016 елдан бирле биләгән Тула өлкәсе җитәкчесе вазифасыннан азат ителгән. Николай Патрушев моңарчы Иминлек советы секретаре вазифасыннан азат ителде, постка элеккеге саклану министры Сергей Шойгу расланды.

Upd. (11.14): 2016 елдан 2020 елга кадәр РФ Икътисади үсеш министрлыгы белән җитәкчелек иткән, ә 2020 елдан 2024 елга кадәр дәүләт башлыгы ярдәмчесе булган Максим Орешкин Президент Администрациясе җитәкчесе урынбасары итеп билгеләнде.

Президентның башка ярдәмчесе Игорь Левитин дәүләт башлыгы киңәшчесе һәм транспорт өлкәсендә халыкара хезмәттәшлек буенча махсус вәкил буларак расланды. Ул 2013 елдан Путинның ярдәмчесе, аңа кадәр бер ел дәвамында аның киңәшчесе була. Ә аңа кадәр 2004 елдан 2012 елга кадәр транспорт һәм элемтә министры булып эшли.

Антон Вайно Президент Администрациясе башлыгы вазифасын биләвен дәвам итә. Сергей Кириенко һәм Алексей Громов аның беренче урынбасарлары булып кала. Дмитрий Песков Президентның матбугат сәркатибе һәм Президент Администрациясе башлыгы урынбасары вазифаларында кала.

Моннан тыш, Владимир Путин Президентның федераль округлардагы барлык вәкаләтле вәкилләрен яңадан билгеләде.