ՌԴ-ում կործանված Լ-39 ուսումնական ինքնաթիռի օդաչուների մարմինները հայտնաբերվել են Ազովի ծովում
Հինգշաբթի Ազովի ծովն ընկած Լ-39 ուսումնական ինքնաթիռի երկու օդաչուն էլ զոհվել է: BBC-ի փոխանցմամբ՝ այս մասին տեղեկացրել է ՌԴ պաշտպանության նախարարությունը:
Հիշեցնենք, որ ավելի վաղ հաղորդվում էր, որ օդաչուներին հաջողվել է ինքնանետում իրականացնել: «Հոկտեմբերի 20-ին ավիավթարի վայրում իրականացված որոնողական աշխատանքների արդյունքում պարզվել է զոհված օդաչուների մարմինների մասերի գտնվելու վայրը», - ասվում է ռազմական գերատեսչության հաղորդագրության մեջ:
Մարմնի հայտնաբերված մասերը դուրս են բերվել ջրից: Օդանավի մեծ բեկորները ջրից դուրս բերելու համար դեպքի վայր է ուղարկվել Սևծովյան նավատորմի փրկարարական մոտորանավակը:
Աղբյուրի հաղորդմամբ՝ նախնական վարկածով ինքնանետում իրականացնելուց հետո օդաչուներն ընկել են ջուրը: