Үзәк һәм Идел буе федераль округларында язгы ташу куркынычы югары булу турында кисәттеләр

2026 елда Үзәк һәм Идел буе федераль округлары төбәкләрендә язгы ташу куркынычы югары булу көтелә. Моның сәбәбе – кар катламы гадәттән тыш күп булу. Бу хакта «РИА Новости»га Илкүләм агроиминиятчеләр берлеге президенты Корней Биждов хәбәр иткән.

Аның сүзләренчә, хәзерге метеорологик хәлне космик мониторинг инструментлары ярдәмендә анализлау кар күләменең рекорд күрсәткечләргә җитүен күрсәтә. Бу исә көзге культуралар өчен куркыныч тудыра.

6 мартка мәгълүматлар буенча, Үзәк федераль округта иң зур кар катламы – 60–80 сантиметр – Калуга, Тула һәм Орёл өлкәләрендә күзәтелә. Владимир өлкәсендә, шулай ук Иваново һәм Рязань өлкәләренең күрше районнарында кар биеклеге якынча 50–60 сантиметр тәшкил итә.

Идел буе федераль округының кайбер төбәкләрендә күрсәткечләр тагын да югарырак. Мәсәлән, Түбән Новгород өлкәсендә кар катламы якынча 70 сантиметрга җитә, ә Югары Идел буе төбәкләрендә – Чувашия Республикасы, Марий Эл Республикасы, Удмуртия Республикасы һәм Киров өлкәсендә – кайбер урыннарда 90 сантиметрга кадәр җитә.

Шул ук вакытта Кара туфраклы төбәкләрнең көньягында һәм Түбән Идел буенда көндезге температура күтәрелү сәбәпле кар катламы әкренләп кими һәм хәзер 10–12 сантиметрдан артмый, дип яза «Татар-информ».