Кыыл Уола төрөөбүтэ 125 сыла: Культурнай-историческай экспедиция ытык Ыгыатта сириттэн саҕалаата

Сэргэй Афанасьевич Сибиэрэп — Кыыл Уола төрөөбүтэ 125 сылыгар ананар…

С.А.Сибиэрэп — Кыыл Уола төрөөбүтэ 125 сылын көрсө  Саха сирин Үҥкүү национальнай театрын директора А.И.Алексеев салайыытынан, сүрүн балетмейстер Долаана Федотова, балетмейстер Юрий Федоров, Россия суруйааччыларын Сойууһун чилиэнэ Юрлов Николай Алексеевич кыттыылаах культурнай-историческай экспедиция Сунтаар улууһугар үлэтин айылҕаттан айдарыылаах Сэргэй Сибиэрэп үөскээн-төрөөн ааспыт  ытык Ыгыатта сириттэн саҕалаата. Салгыы экспедиция кыттыылаахтара норуот ырыаһыта айар үлэтинэн уутуйан дьарыктаммыт, эдэр ыччаты кэрэҕэ уһуйбут Элгээйитигэр  кэлэн, улуу киһи пааматынньыгар сибэкки дьөрбөтүн уурдулар. Фольклор түмэлигэр  ыалдьыттар алаадьынан, кымыһынан күндүлэннилэр, «Дьүһүйүү»норуодунай фольклорнай ансаамбыл тойугунан алгыстанан, Евдокия Захарова оһуокайыгар дэгэйэн умнуллубат түгэн тосхойдо.

Көрсүһүүгэ нэһилиэк баһылыга П.А.Григорьев, С.А.Сибиэрэп тэрийбит ансаамбылын кыттыылаахтара З.И.Саввинов, К.М.Кривошапкина, М.Ф.Сидорова, Е.И.Павлова, В.Г.Семенова, А.П.Иванов, «Оһуор» култуура киинин салайааччыта В.Н.Семенов, специалистар Э.С.Николаева, Е.В.Захарова, оҕо искусствотын оскуолатын хореографтара И.Е.Аввакумова, С.А.Григорьева саха омук киэн туттар ытык киһитэ Сэргэй Афанасьевич Зверев-Кыыл Уолун сомоҕо талаанын арыйан киэҥ кэпсэтии, дириҥ ырытыһыы таҕыста. Үҥкүү театра С.А.Сибиэрэп-Кыыл Уола үбүлүөйдээх сылыгар  саҥа үҥкүүлэри, туруоруулары, документальнай кинигэ  тахсыытын бэлэмниир. Ону сэргэ Кыыл Уола үҥкүүлэрэ кини көрдөрөн, ыйан биэрбит хайысхаларынан сайдан иһэллэригэр сүрүн болҕомтотун  туһаайар. Бу көрсүһүүгэ «Оһуор» үҥкүүтүн «ыраастааһыҥҥа» хорутуулаах үлэ барда. Үбүлүөйдээх сыл былааныгар киин сиргэ, долгуйар Дьокуускай куоракка С.А.Сибиэрэп -Кыыл Уола аатынан дьиэ дьэндэйдэр, кини айбыт, туруорбут үҥкүүлэрэ, ырыата-тойуга, оһуокайа үгүс улуус дьонун кутун-сүрүн угуттуо этэ диэн Александр Иванович этиитэ биир санаанан өйөннө. Экспедиция кыттыылаахтара аны улуус киинигэр Сунтаарга үлэлиэхтэрэ.

Сообщение Кыыл Уола төрөөбүтэ 125 сыла: Культурнай-историческай экспедиция ытык Ыгыатта сириттэн саҕалаата появились сначала на SAKHALIFE.