Афғонистонда самолёт ҳалокатидан омон қолганларнинг видеолари намойиш қилинди

^{Фото: Ҳуррият}

Афғонистонда россияликларнинг Falcon 10 самолёти ҳалокатидан омон қолганларнинг видео ва суратлари намойиш этилди.

Ҳуррият нашри аниқлик киритишича, самолёт Афғонистон ҳарбий-ҳаво кучлари қутқарув жамоаси томонидан мамлакатнинг “чекка ва тоғли ҳудудида” аниқланган. Ҳалокатдан омон қолганлар аввалига туман марказига олиб келинган, у ердан Кобулдаги шифохонага олиб кетилган.

Шот Telegram канали хабар беришича, учувчилар Дмитрий Беляков ва Аркадий Грачев, шунингдек тиббиёт ходими Павел Попов жиддий жароҳат олмаган. Каналнинг қайд этишича, тиббиёт ходимларидан яна бири Игор Сивороткиннинг ҳолати қониқарли баҳоланмоқда.

Радиостанциянинг аниқлик киритишича, қутқарув амалиёти якунланган. Нашр хабарида самолёт йўловчилари —волгодонсклик Анатолий ва Анна Евсюковлар ҳақида маълумот йўқ. “РИА Новости” фавқулодда хизматларга таяниб ёзишича, улар ҳалок бўлган. Уларнинг жасади 23 январь куни Кобулга учадиган махсус борт орқали олиб қайтилади.

Кеча, 21 январь куни Ҳиндистоннинг Гая шаҳридан Тошкентга учган Falcon-10 самолёти ҳалокатга учради. Самолёт бортида 6 киши — тўрт экипаж аъзоси ва икки йўловчи бўлган. Улардан тўрт нафари омон қолган.

“ТАСС” агентлиги фавқулодда хизматларга таяниб ёзишича, самолёт ҳалокатига иккита двигатель ишламай қолгани сабаб бўлган. РФ Тергов қўмитаси ҳолат юзасидан жиноий иш очган.