Բորիս Ջոնսոնը խոստովանել է, որ վարչապետ եղած ժամանակ փորձել է արքայազն Հարրիին համոզել չհեռանալ Մեծ Բրիտանիայից

Մեծ Բրիտանիայի նախկին վարչապետ Բորիս Ջոնսոնը փորձել է արքայազն Հարրիին համոզել կնոջ՝ Մեգան Մարքլի հետ չհեռանալ Մեծ Բրիտանիայից. այս մասին, The Telegraph-ի փոխանցմամբ, պատմել է նախկին վարչապետը։

Ջոնսոնի խոսքով՝ 2020 թվականի հունվարին իրեն խնդրել են Սասեքսի դուքսի հետ «տղամարդավարի զրույց տանել»՝ համոզելու նրան, որ հետ կանգնի իր թագավորական պարտականությունները վայր դնելու և երկրից հեռանալու որոշումից:

Նշվում է, որ Բուքինգհեմյան պալատի և Դաունինգ սթրիթի պաշտոնյաները կարծում էին, որ վարչապետի միջամտությունը կարող էր հաջողությամբ հետ պահել արքայազն Հարրիին իր որոշումից:

Այնուամենայնիվ, չնայած իր ջանքերին, դուքսը հաջորդ օրը մեկնել է Կանադա, ինչը խզում է առաջացրել թագավորական ընտանիքի մնացած անդամների հետ հարաբերություններում: