Վիետնամի նախագահը պետական այցով գտնվում է Չինաստանում

Չինաստանի նախագահ Սի Ծինփինն օգոստոսի 19-ին հանդիպել է Վիետնամի նախագահ Թո Լամի հետ, որը պետական այցով գտնվում է Պեկինում։ Այս մասին հաղորդում է Xinhua գործակալությունը։

Սի Ծինփինը ևս մեկ անգամ շնորհավորել է Թո Լամին՝ մայիսին Վիետնամի նախագահի պաշտոնը ստանձնելու առթիվ։ Օգոստոսի սկզբին Թո Լամը ստանձնել է նաև Վիետնամի կոմունիստական կուսակցության գլխավոր քարտուղարի պաշտոնը։

Պաշտոնը ստանձնելուց ի վեր սա Թո Լամի առաջին արտասահմանյան ուղևորությունն է։ Սի Ծինփինի խոսքով՝ սա «լիարժեք արտացոլում է այն մեծ կարևորությունը, որ նա տալիս է երկու կուսակցությունների և երկու երկրների միջև կապերին», ինչպես նաև ցույց է տալիս Չինաստան-Վիետնամ հարաբերությունների ռազմավարական նշանակությունը։

Օգոստոսի 18-ին Վիետնամի ղեկավարը ժամանել է Գուանչժոու քաղաք, որտեղ այցելել է Վիետնամի կոմունիստական կուսակցության հիմնադիր Հո Շի Մինի  (1890-1969 թթ.) հեղափոխական գործունեության վայրերը։ 

Պետական այցի ընթացքում Վիետնամի ղեկավարը նաև հանդիպումներ կունենա Չինաստանի պետխորհրդի վարչապետ Լի Ցյանի, Ժողովրդական ներկայացուցիչների համաչինական ժողովի (խորհրդարանի) մշտական հանձնաժողովի ղեկավար Չժաո Լեցզիի և Չինաստանի Ժողովրդական քաղաքական խորհրդակցական խորհրդի (բարձրագույն խորհրդակցական մարմին) նախագահ Վան Հունի հետ: